நான்....

எனக்காக நான் வரைந்த என் சுயசரிதை .......
நான்....
வரிகளால் வரையறுக்க முடியாத
ஒரு வார்த்தையில்
ஓர் வரலாறு ....
அழுததில்லை நான்
அணைக்க யாருமில்லை என்பதால்!
வலிகளை வெளிக்காட்டத்தெரியாமல்
இதயத்தில் கொட்டிக் கொட்டி
இரும்பாய் போனதே மிச்சம்!!
எல்லா உணர்வுகளும்
மறந்தே போனது!
சிரிப்பைத் தவிர ..
என்னைச் சுற்றி
நண்பர்கள் கூட்டம் அதிகம்
என்பதை விட....
நல்லவர்கள் கூட்டம் அதிகம்
எனலாம்....
யாருக்கும் தவறு நினைத்ததில்லை
ஆனால்
தவறாய் நினைத்திருப்பேன் . .
சில நேரம் மட்டுமே
அதன் ஆயுட்காலம் ...
சில நேரங்களில்
காக்கைகளும் சீண்டாத
பிணமாய் கிடந்திருக்கிறேன்...
சில நேரங்களில்
பூக்களின் புன்னகையில்
புதைந்து கிடந்திருக்கிறேன்...
தோல்விகள்
என் தோழன்...
ஆனால் நான் தோள் சாய்ந்ததில்லை...
வெற்றிகள்
மன்னிக்கவும்! நான் பழகியதில்லை...
வாழ்க்கை
வாழ்ந்து விடலாம் என்பதில்
நம்பிக்கை அதிகம் .
இதோ நாட்களை
சுமந்து கொண்டு!!
நான்.

தோழியே !

தோல் சாயும் தந்தையிடம்
கிடைக்காதது தோழமையிலும்
கிடைக்கலாம் . . .
ஆம் !
கிடைத்தது உன்னிடத்தில் . . .

உன் முதல் பார்வையிலே
எனக்கு ஒரு சந்தேகம்
முன் பிறவி சிநேகத்தின்
பிரதிபலிப்பு . . .

எதாவது எழுத வேண்டும்
உன்னைப் பற்றி . . .
இது என் இதயத்தின் வேண்டுகோள் . . .

அதிக நாள் பழக்கமும்
அரை நொடியில் தொலைந்து
போகலாம் . ..
ஆனால்
அரை நொடி நட்பும்
ஆயுள் வரை தொடரலாம் . . .
எனகென்னவோ
அப்படிதான் உன் நட்பும் !
ஆயுட்காலம் வரை . . .

இவ்வளவு நாள்
ஆண் பெண் நட்பில்
அதிகம் நம்பிக்கை இல்லை . . .
நம்புகிறேன் இன்று ? . .

நண்பன் அழும் போது
அவன் அழ
உன் கண்களை கொடுப்பதை விட
துடைக்க கைகளை கொடு . . .
சில நேரங்களில் அல்ல
பல நேரங்களில் உன் கைகளை
பார்த்திருக்கிறேன் . .

உன் தாய் ,தந்தை
கொடுத்த நட்பு சுதந்திரம்
நம்பிக்கையின் எவரெஸ்ட் . . .
தலை வணங்குகிறேன் . . .

பல சொந்தங்கள்
பல உறவுகள்
பதிக்கிறது உன் நட்பு
" நினைவுச் சின்னம் "

நட்பு கடலை விட
வானை விட
பெரியது என்பார்கள் . . .
நட்பு புனிதமானது
தெய்வீகமானது
என்பார்கள் . . .அப்படியா ?
இல்லை . .
ஒரு சின்ன
சந்தோஷமான உணர்வு
அடுத்தவர்களுக்காக
நாம் வாழும் வாழ்கை . . .
நீ இதை முழுமை செய்திருக்கலாம் ?

இந்த வரிகளை
நீ வாசிக்கும் போது
உன் இதழ்கள் புன்னகைக்கலாம் . . .
பரவாயில்லை .. .
அதுவும் எனக்கு
ஒரு சின்ன சந்தோஷம் தான் . . .

ஒரு சின்ன வேண்டுகோள் . .
நாட்கள்
வாரங்கள்
மாதங்கள்
வருடங்கள்
நட்புக்கு எல்லை விதிப்பதில்லை . . .
நண்பர்களால் மட்டுமே மறக்கபடுகிறது . . .
மறந்து விடாதே. . . !

மீண்டும் உன்னை போல்
ஒரு உண்மையான நட்பை தேடி . . . .


. . . .அன்பு நண்பன் . . .

அம்மா !

அம்மா.......
என் முதல் அழுகையை பார்த்து
நீ சிரித்தாய்
என்பதற்காக என்னவோ
இன்னும்
அழுது கொண்டிருக்கிறாய்
எனக்காக !

சூரியன்
என் முகம் சுடுமோ என்று
உன் சேலையில்
என் முகம் மூடினாய் . . .

எனக்காக
நடந்து நடந்தே
வறண்டு போன
உன் பாதங்களுக்கு
ஈரம் கொடுக்கிறது
என் கண்ணீர் . . .

இன்னும் நான் சாப்பிடுவேன் என்று
எதிர்பார்த்து எதிர்பார்த்தே
பழையதாகி போன சோறு
உன் தட்டில் ...
அன்றும் எனக்காக கொதித்து
கொண்டிருந்தது கறிக்குழம்பு
அடுத்த வேளைக்கு !. . .

உன் கிழிந்து போன
ஆடையை கூட
கணக்கில் கொள்ளாமல்
என் அலமாரியில்
ஆடைக் கணக்கை
கூட்டினாய். . . .

எத்தனை கஷ்டம்
அத்தனையும் சுமந்து கொண்டு
அழகு சிரிப்பு
சிரித்தாய் எனக்காக !

அம்மா !
அழ நினைக்கிறேன்
எங்கே தாலாட்டும் உன் மடி . . .
எத்தனை பிறவிகள்
வேண்டும் . .
நான் அத்தனையும்
திருப்பி செய்ய . ..

உன் ஜாக்கெட் கிழிசலை விட
என் பாக்கெட் கிழிசல்
உனக்கு எப்படி பெரியதாய் தெரிந்தது . . .?
தூக்கத்தை தொலைத்தாய்

துக்கத்தை மறைத்தாய்
ஏன்?
நான் சிரிக்க வேண்டுமா ?

அம்மா !
என்னிடம் என்ன எதிர்பார்க்கிறீர்கள் ?
உங்கள் எதிர்பார்ப்பை பூர்த்தி செய்ய
என்னால் எப்படி முடியும் . . .?

எனக்கென்னவோ சிறிய காய்ச்சல் தான்
உனக்கேன் இப்படி நடுக்கம் . . .

உச்சி வெய்யிலில்
குச்சியாய் போனது உன் தேகம்
ஆனாலும்
ஆலை சங்கொலி கேட்டதும்
அன்பு மகன்
விழித்திருப்பான் என்று
அறை குறை வேலை முடிப்போடு
என் அறை நோக்கி
ஓடி வருவாய் . . . !

காசு போட முடியாமிலிருந்தும்
கடன் வாங்கி உன் மகனுக்கு
ஜீன்ஸ் போட்டு
அழகு பார்த்தாய் . . .

உனக்கென
நான் எழுதியதும்
என் விரல்கள் உதறியதை விட
என் விழிகள் உதறியதே அதிகம் . . .

கண்ணீர் மல்க கேட்கிறேன்
அம்மா . .!
என் ஆயுளில் பாதி எடுத்து
உன் ஆயுளோடு சேர்த்து
எனக்காக என்னோடு வாழ்வாயா?
உன்னைத் தவிர
யாரிடம் தேடுவேன்
இந்த பாசத்தை . . .



. . . .அன்பு மகன் . . .